ဆန္ဒပြတိုင်းရပ်ပေးရမှာလား

လက်ပံတောင်းတောင် ကြေးနီစီမံကိန်းနဲ့ပတ်သက်ပြီး ဒီစီမံကိန်းကြီးကို လုံးဝရပ်တန့်ပေးဘို့ တောင်းဆိုနေသံတွေ တော်တော်လေး ကျယ်ကျယ်လောင်လောင်ဖြစ်လာတာကိုတွေ့ရပါတယ် မြန်မာမီဒီယာတွေကတော့ ထုံးစံအတိုင်းပါဘဲ ဟိုနားမှာဆန္ဒပြနေပြီ ၊ တရုတ်သံရုံးရှေ့ပြတော့မယ် ၊ ဟိုမှာတော့ ဘုန်းကြီးတွေပါလာပြီ ၊ ဦးအောင်မင်းကတော့ တရုတ်ဘက်ကကာကွယ်ပြောနေတယ် ၊ အစရှိသဖြင့်ပေါ့လေ မျက်ဖြူဆိုက်လေ ဆရာကြိုက်လေဖြစ်ပြီး ရေးနေသားနေတာကိုတွေ့ရပါတယ် ။ အမျိုးသားအကျိုးစီးပွားကိုရှေ့ရှု ၊  တစ်ကမ္ဘာလုံးကိုခြုံငုံသုံးသပ်ပြီး ဒါမျိုး ဖြစ်သင့်မဖြစ်သင့် ၊ ရပ်သင့်မရပ်သင့်သုံးသပ်ရေးတာသားတာမတွေ့ရပဲ  အစိုးရအကျပ်ဆိုက်လေ မီဒီယာဝမ်းသာလေဆိုတာမျိုးလုပ်နေတာတွေ့ရပါတယ်  ။

ဒီစံမံကိန်းကြီးချွင်းချက်မရှိရပ်ပေးဘို့တောင်းဆိုနေကြတဲ့ဒေသခံလို့သူတို့ကိုယ်သူတို့ဆိုသူတွေကတော့ သဘာဝပတ်ဝန်းကျင် ဘယ်ကဲ့သို့ ပျက်စီးပါတယ် ၊ ရေကတော့ရှားကုန်ပြီ ၊  ဒေသခံတွေကတော့ ဘယ့်နှယ်နစ်နာကုန်ပါပြီ ၊ ရွာတွေရွှေ့ရတော့မယ် ဒီတော့စားရေးသောက်ရေးခက်ကုန်ပြီဆိုပြီးတော့ မဲပြာပုဆိုးဝတ်လာတာတွေ့ရပါတယ် ။

 ဒီစီမံကိန်းကြီးဟာ ၁၉၉၆ ခုနှစ်ကတည်းက အိုင်ဗင်ဟို သတ္တုတွင်းကုမ္မဏီနဲ့ သတ္တုတွင်းဝန်ကြီးဌာန အမှတ်(၁) သတ္တုတွင်းလုပ်ငန်းတို့ပေါင်းပြီး ဆတူ (၅၀/၅၀) ပိုင်ဆိုင်တဲ့  မြန်မာအိုင်ဗင်ဟို ကော့ပါးကုမ္ပဏီလီမိတက်ကို ထူထောင်ပြီး စတင်ခဲ့တာဖြစ်တယ်  ၂၀၁၀ ပြည့်နှစ် ဒီဇင်ဘာလ ၃၁ ရက်နေ့ကျမှ အမှတ် (၁) သတ္တုတွင်းဝန်ကြီးဌာနက ပိုင်တဲ့ အစုရှယ်ရာ ၅၀ ရာခိုင်နှုန်းကို မြန်မာနိုင်ငံ စီးပွားရေး ဦးပိုင်လီမိတက်ကိုရောင်း၊ အိုင်ဗင်ဟိုက ပိုင်တဲ့ အစုရှယ်ယာ ၅၀ ရာခိုင်နှုန်းကို (NORINCO) လက်အောက်ခံ ကုမ္ပဏီတစ်ခုဖြစ်တဲ့ ၀မ်ဘိုကုမ္ပဏီ Myanmar wanbao Mining Copper Ltd (MWMCL) ကိုရောင်းခဲ့တာဖြစ်တယ် ။အိုင်ဗင်ဟိုးလုပ်နေတဲ့ တစ်သက်လုံးက ဘာသံမှမကြားရပဲ တရုတ်ကုမ္ပဏီနဲ့ စစ်တပ်ပိုင် ဦးပိုင်ကလုပ်မှ ခုလိုအသံတွေထွက်လာတာဟာ ရိုးမှရိုးရဲ့လားလို့ စဉ်းစားစရာ ဖြစ်လာတယ် ။

ဒီလိုရိုးရိုးလေးစဉ်းစားကြည့်ရအောင်...... ကြေးနီထုတ်ရင်သဘာဝပတ်ဝန်းကျင်ပျက်မယ် ဒီလိုသဘာဝပတ်ဝန်းကျင်ဆိုတာကြီးပျက်မှာစိုးလို့ ကြေးနီဆိုတာကြီးကို တစ်ကမ္ဘာလုံး မထုတ်ပဲနေကြသလားဆိုတာကြည့်ရအောင်ပါ -

ဒီဇယားက  British Geological Survey ကနေထုတ်ပြန်ထားတဲ့ ကမ္ဘာ့ကြေးနီအထုတ်ဆုံး ၁၀ နိုင်ငံစာရင်းပါ ဒီစာရင်းအရ ချီလီနိုင်ငံကအများဆုံးထုတ်တာဖြစ်ပြီး တစ်ကမ္ဘာလုံးက သဘာဝပတ်ဝန်းကျင်ထိန်းသိမ်းမှုနဲ့ပတ်သက်ရင်စံထားရပါတယ်ဆိုတဲ့ အမေရိကန်ပြည်ထောင်စုက ၂၀၀၆ မှာတန်ချိန်ပေါင်း ၁.၂၂ သန်း ၂၀၀၉ မှာ တန်ချိန်ပေါင်း ၁.၃၁ သန်းကျော်ထုတ်လုပ်ပြီး ကမ္ဘာ့ကြေးနီထုတ်လုပ်မှုမှာ ဒုတိယနေရာကလိုက်နေတာတွေ့ရမှာဖြစ်ပါတယ် ၊ ဒီစာရင်အရကြည့်ရင်မြန်မာနိုင်ငံက ၂၀၀၆ စာရင်းအရ ၁၉၅၀၀ တန် ထုတ်လုပ်ပြီး ၂၈ နေရာရောက်နေတာတွေ့ရမှာဖြစ်ပါတယ် -

ကြေးနီတူးရင်တော့ တကမ္ဘာလုံးဘယ်နေရာတူးတူး သဘာဝပတ်ဝန်းကျင်ကတော့ အနည်းနဲ့အများထိခိုက်မှာပဲ သဘာဝပတ်ဝန်းကျင်မထိခိုက်ပဲ အလိုလိုကြေးနီရတဲ့နည်းကတော့ စင်္ကြာဝဠာမှာမပေါ်သေးဘူး ။

ဒါအမေရိကန်ပြည်ထောင်စု နယူးမက္ကဆီကိုပြည်နယ်က ကြေးနီသတ္တုမိုင်းတစ်ခုပါ ၁၈၀၀ ပြည့်လွန်နှစ်တွေထဲကနေ ဒီနေ့ထိထုတ်နေတာပါ နှစ်ပေါင်းရာချီပြီး နှစ်စဉ်တန်သန်းနဲ့ချီ ထုတ်နေတဲ့ နိုင်ငံတွေကဘာသံမှမကြားရပဲ ၁၀နှစ်ကျော်လောက်ထုတ်ပြီး တန်သောင်းဂဏန်းထုတ်တဲ့တိုင်းပြည်ကအသံထွက်နေတယ် ၊ ပညာမတတ်ဘူးလို့ပြောရင်လဲနာဦးမယ် ။

ခုတလောဖြစ်စဉ်တွေကြည့်လိုက်ရင် ဘာဖြစ်လိုက်ဖြစ်လိုက် နောက်ကွယ်မှာ NGO တွေတနည်းမဟုတ်တနည်းပါဝင်ပတ်သက်နေတယ် ခုလည်း ဒီဒေသမှာ အမေရိကန်ထောက်လှမ်းရေးတွေ ပါကစ္စတန်မှာ အိုစမာဘင်လာဒင်ကိုရှာတဲ့အခါတုန်းက အစက်ချဆေးတိုက်ပြီးပါကစ္စတန်တစ်ခွင်ပြဲပြဲစင်ခဲ့တဲ့ NGO က လက်ပံတောင်းတောင် ကြေးနီစီမံကိန်း တစ်ဝိုက်မှာရောက်နေတာကို သတိပြုမိတယ် ။

နောက်တစ်ခုက မြန်မာပြည်အပြောင်းအလဲမှာ သတ္တုတူးဖေါ်ရေးကဏ္ဍရင်းနှီးမြှုတ်နှံသူတွေဟာ လက်ပံတောင်းတောင်ကိစ္စမှာ အစိုးရရဲ့ကိုင်တွယ်ပုံကိုစောင့်ကြည့်နေတယ် ၊ အစိုးရရဲ့ ကိုင်တွယ်ပုံဟာ ဒေါ်လာဘီလျံချီရင်းနှီးမြှုတ်နှံသူတွေကို အယုံအကြည်မဲ့သွားစေမယ်ဆိုရင်တော့ ........

ဒေါက်တာဆိတ်ဖွား