xmlns:fb="https://www.facebook.com/2008/fbml"> Voice Of Myanmar: နိုင်ငံပိုင်မီဒီယာများအပေါ် ဒေါက်တာဆိတ်ဖွား၏အမြင်

Wednesday, October 5, 2011

နိုင်ငံပိုင်မီဒီယာများအပေါ် ဒေါက်တာဆိတ်ဖွား၏အမြင်



သမ္မတကြီးဦးသ်ိန်းစိန်ဦးဆောင်သော မြန်မာအစိုးရသစ်လက်ထက်တွင် အပြောင်းအလဲ များစွာကို အကောင်းဘက်သို့ ဦးတည်သောအရွေ့ဖြစ်အောင် ကြိုးစားလုပ်ဆောင်နေသည်မှာ ထင်သာမြင်သာရှိပြီး အပြုသဘောဆောင်သည်မှာ အငြင်းပွားဖွယ်မရှိပါ ။အချို့သံသယဖြင့်စောင့်ကြည့်ဦး မည်ဟု ပြောဆိုမှု များရှိသော်လည်း အချိန်ကြာလာသည်နှင့်အမျှ အပြောင်းအလဲများသည် တဖြည်းဖြည်းရုပ်လုံးပေါ် လာပြီဖြစ်၍ အဆိုပါသံသယများသည်လည်း လျော့ပါးတန်သလောက် လျော့ပါးလာ သည့်အခြေအနေမျိုးဖြစ်လေသည်  ။ နှစ်ပေါင်းများစွာအယုံအကြည်ကင်းမဲ့နေရာမှ ဤမျှသောအချိန်တို အတွင်းတွင် ယခုလောက် ယုံကြည်မှုရရှိလာခြင်းဆိုသည်မှာ ပင်အပေါင်းလက္ခဏာ သဘောပင်ဖြစ်ပြီး သံသယရှိသူများကိုလည်း အပြစ်မတင်ထိုက်ပါပေ ။

မီဒီယာကဏ္ဍလည်းပါ 

ထိုသို့သောပြုပြင်ပြောင်းလဲရေးဆောင်ရွက်ရာတွင် မီဒီယာကဏ္ဍတွင်လည်း အရေးပါသော အပြောင်းအလဲများကိုပြုလုပ်လာသည်ကိုတွေ့ခဲ့ရပေသည်  ။တင်းကြပ်သောစာပေစီစစ်ရေးသည် မထင်ရလောက်အောင်ပင် လိုက်လျောဖြေလျော့မှုများပြုလုပ်လာသည် ။ အချို့ဂျာနယ်များကို စီစစ်ရေးပင်မလိုတော့ပဲ ထုတ်ဝေပြီးမှ စီစစ်ရေးကို တင်ပြရသည့်အခြေအနေမျိုးရောက်လာလေ၏ ။စီစစ်ရေးသို့ တင်ပြပြီးမှထုတ်ဝေခွင့်၇သော ဂျာနယ်များနှင့်စာများသည်လည်း အတော်အတန်လွတ်လပ်စွာ ရေးသားလာနိုင်သည်ကိုတွေ့ရလေသည် ။ ဒေါ်အောင်ဆန်းစုကြည်၏လှုပ်ရှားမှု သတင်းများ ၊ သူမနှင့်အင်တာဗျုးများ ၊ ဆောင်းပါးများကို အဖြတ်အတောက်မရှိသလောက် နီးပါးဖေါ်ပြခွင့်ရရှိလာခြင်း ၊ NLD မှဦးဝင်းတင်၏ စာအုပ်များတစ်အုပ်ပြီးတစ်အုပ် ထုတ်ဝေခွင့်ရရှိလာခြင်းတို့သည် ထင်ရှားသောသာဓကများဖြစ်သည်  ။

ပြည်ထောင်စုဝန်ကြီးကိုပါဝေဖန်လာနိုင်

မြစ်ဆုံဆည်ကိစ္စတွင် အစိုးရနှင့်သဘောထားခြင်းဆန့်ကျင်သည့်အယူအဆများကို တွင်တွင်ကျယ် ကျယ် ဖေါ်ပြခွင့်ရလာသည် ၊ အလားတူပင်အစိုးရနှင့်သဘောထားမတူ ဆန့်ကျင်ဘက် အသွင်ဆောင်သော ဟောပြောပွဲများ ၊ အလုပ်ရုံဆွေးနွေးပွဲများကျင်းပခွင့် ရလာလေ၏ ၊ ဖေါ်ထုတ်ခွင့်ရလာလေ၏ ၊ ထိုကိစ္စတွင် ပြည်ထောင်စုဝန်ကြီး ဦးဇော်မင်း၏ သတင်းစာရှင်းလင်းပွဲတစ်ခု တွင်  ဖြေကြားချက်မှ အားနည်းသည်များကိုကောက်နှုတ်ကာ အဆိုပါပြည်ထောင်စု ၀န်ကြီးအား ပြင်းပြင်း ထန်ထန် ဝေဖန်သည့်သတင်းဖေါ်ပြချက်များ ၊ ဆောင်းပါးရေးသားချက်များကို အကန့်အသတ်မရှိဖေါ်ပြလာလေ၏ ၊ဖေါ်ပြခွင့်လည်းရရှိလာလေ၏ ၊ အဆိုပါသတင်းဖေါ်ပြချက်များ၏ အကျိုးဆက်ကြောင့်ပင် နောက်ဆုံးတွင် မြစ်ဆုံရေကာတာကြီးကို မိမိတို့ အစိုးရလက်ထက်တွင် ဆက်လက်တည်ဆောက်ခြင်းမပြုပဲ ရပ်ဆိုင်ထားတော့မည်ဖြစ်ကြောင်း နိုင်ငံတော် သမ္မတမှ ကြေငြာရသည်အထိ ဖြစ်ခဲ့လေသည်  ။

ပုဂ္ဂလိက မီဒီယာများခေါင်းထောင်လာ 

ဆိုလိုသည်မှာ နိုင်ငံတော်မှပြောင်းလဲ ကျင့်သုံးလာသော စာပေနှင့်စာနယ်ဇင်းဆိုင်ရာမူများကြောင့် ပုဂ္ဂလိက မီဒီယာကဏ္ဍသည် အတော်ပင်တိုးတက်ပြောင်းလဲလာလေ၏ ၊ နိုင်ငံရေးနှင့်ပတ်သက်သောဂျာနယ် အတော်များများ ပေါ်ပေါက်လာခဲ့လေသည် ။ ပြည်သူများလည်းသတင်းများကို အချိန်နှင့်တပြေးညီသိခွင့်ရလာလေ၏ ၊ သတင်းနှင့်စာနယ်ဇင်း ဆိုင်ရာလွတ်လပ်မှုနှင့်အတူ ဘေးထွက် ဆိုးကျိုးများလည်း ကျွဲကူးရေပါဆိုသလိုပင် ပါလာလေ၏ ပြည်သူလူထုနှင့် အစိုးရအကြား ထင်ယောင်ထင်မှား ဖြစ်စေနိုင်သောသတင်းများကို သတင်းအရင်းအမြစ်မသေချာပဲ ဖေါ်ပြလာလေ၏ ၊ အိမ်နီးချင်းနိုင်ငံများနှင့် ပြည်သူများကြားသဘောထားကွဲလွဲနိုင်သည်များကို အထင်နှင့်ရေးသားမှုများ အကြားနှင့်ရေးသားမှုများ ၊ တာဝန်ရှိသူတို့၏ပြောကြားချက်များကို တစ်လွဲကောက်ချက်ချမှုများ ပြုလုပ် လာကြလေ၏ ၊ လွှတ်တော်တွင်းသတင်းရယူရာတွင် အချို့သတင်းမီဒီယာများက အတွေ့အကြုံရှိသူဝါရင့် သတင်းထောက်ကြီးများကိုစေလွှတ်သတင်းရယူမှုမျိုးရှိသော်လည်း အချိုကသောသတင်းမီဒီယာများကမူ လွှတ်တော်ဆိုသောအရာကို မည်သို့အရာမှန်းမသိသူများ ၊ တစ်ခါဘူးမှအတွေ့အကြုံမရှိသူများကို လွှတ်တော်အတွင်းတွင် သတင်းထောက်အဖြစ် သတင်းယူရန်စေလွှတ်သည်များလည်းရှိလေသည် ။လွှတ်တော်များနှင့်အဆက်ပြတ်ခဲ့သည်မို့ အပြစ်မတင်သာသော်လည်း လွှတ်တော်ဟူသောနေရာ ကိုကား လေးစားသမှုရှိသင့်သည် ။

နောက်ကျကျန်နေသော နိုင်ငံပိုင်မီဒီယာများ

နိုင်ငံပိုင်မီဒီယာများ ဆိုသည်မှာ နိုင်ငံပိုင်သတင်းစာများနှင့် ရုပ်မြင်သံကြား ဌာနများကိုဆိုလိုပါသည် ။ ပုဂ္ဂလိက မီဒီယာများက အရှိန်နှင့်ချီတက်နေချိန်တွင် မှန်သည်များလည်းရှိ၏ မှားသည်များလည်းရှိမည်မှာ ဓမ္မတာပင်ဖြစ်သည် ၊ ထိုအမှားအမှန်များကို ချိန်ညှိရန် balance လုပ်ရန် တာဝန်မှာ နိုင်ငံပိုင်မီဒီယာများ၏ တာဝန်သာဖြစ်သည် ။ သတင်းမှန်များကို အချိန်နှင့်တပြေးညီ ဖေါ်ပြ ထုတ်ပြန်ပေးရန် အထူးတာဝန်ရှိလှပေသည် ။ မီဒီယာများသည်  အစိုးရ၏ ပြုပြင်ရန်လိုအပ်နေသည်များ အားနည်းချက်များကိုထောက်ပြရန် ၊ ပြည်သူ့အသံများကိုအစိုးရတာဝန်ရှိသူများသိရှိရေးဆောင်ရွက်ရန် တာဝန် ရှိသကဲ့သို့ အစိုးရ၏အသံကို ၊ အစိုးရ၏အခက်အခဲများကို ၊ အပြောလွယ်သလောက် အလုပ်ခက်နေပုံများကို  အကြောင်းအရာတစ်ခုတွင် အစိုးရ၏ ရှုထောင့်မှ အမြင်ကို ပြည်သူများသိရှိရန် လည်းတာဝန်ရှိလှပေသည် ။ထိုတာဝန်ကိုအဓိကယူရမည့်သူများမှာ နိုင်ငံပိုင်မီဒီယာများပင် ဖြစ်လေသည် ။ဤသို့ဆိုလိုက်သဖြင့် အစိုးရ၏ အနာဂတ်စီမံကိန်းများ ၊ လျှို့ဝှက်ချက်များ ၊ ကုန်သွယ်ရေး ဆိုင်ရာအချက်အလက်များ ၊ စစ်ရေးဆိုင်ရာလျှို့ဝှက်ချက်များ  ကိန်းဂဏန်းများကို ဖေါ်ပြပေးရ မည်ဟုမဆိုလိုပါ ၊ ပြည်သူလူထုသိသင့်သိထိုက်သည့်အပိုင်းများကိုသာ ဆိုလိုပါသည် ။
အားမနာတမ်းပြောရပါလျှင် 

နိုင်ငံပိုင်မီဒီယာများ၏ အားနည်းနေသောအပိုင်းများကို အားမနာတမ်း ဖေါ်ပြရမည်ဆိုပါလျှင် အများအပြားပင်ရှိမည်ထင်ပါသည် ထိုအများအပြားထဲမှ ကျွန်ုပ်ကဲ့သို့ လူပြိန်းများပင် မြင်နေရသော အချက်အချို့ကို ထုတ်နှုတ်ရေးသားတင်ပြရသော် ...


( ၁ ) နိုင်ငံပိုင်သတင်းဌာနများအားလုံးလိုလိုသည် သတင်း Website များမရှိကြပါ ၊ ကမ္ဘာပေါ်တွင် သတင်း  အင်တာနက် စာမျက်နှာမရှိသော နိုင်ငံပိုင်သတင်းဌာနဟူ၍ မြန်မာတစ်နိုင်ငံတည်းသာ ရှိမည်ထင်ပါသည် ။


( ၂ ) ပြည်တွင်းသတင်းထောက်ကွန်ယက် ပီပီပြင်ပြင်မရှိပါ ။ ( ပြန်/ဆက်ရုံးများ မြို့များတွင်ရှိသော်လည်း ၊ရုပ်မြင်သံကြား ပြသခြင်း ၊ အခါအားလျှော်စွာ နံရံကပ်စာစောင်များ ကပ်ခြင်း ၊ ပြည်တွင်းထုတ်သတင်းစာနှင့် ၀န်ကြီးဌာနများမှ ရသောဂျာနယ်များအား ရုံးဘေးရှိအဆောင်ထဲတွင်ထားကာ လာရောက်ဖတ်ရှုလိုက ဖတ်ရှုနိုင်ခြင်း ၊ သတင်းစာကိုယ်စားလှယ်လုပ်ခြင်းများ ၊ ကျောင်းများတွင်လုပ်သော မိဘဆရာ အစည်းဝေးသတင်းများထည့်ပေးခြင်း ၊ စည်ပင်မှလမ်းပြင်နေသည်များထည့်ပေးခြင်း များသာ တွေ့နေရ ပါသည် )

( ၃  )  ပြည်ပသတင်းထောက်ကွန်ယက်မရှိပါ ။


( ၄ ) သတင်းရယူမှုနှင့် သတင်းဖြန့်ချိမှု ၊ ရေးသားမှု နှင့်ဖေါ်ပြမှု တို့သည် အလွန်အမင်းရုံးဆန်နေပါသည် ။ပုံသေဆန်လွန်းနေပါသည် ။( ဥပမာ - ပြည်ထောင်စုဝန်ကြီးတစ်ဦးက သက်ဆိုင်ရာဝန်ကြီးဌာန၏ တည်ဆောက်ရေးလုပ်ငန်းတစ်ခုကို စစ်ဆေးသည်ဆိုပါစို့ ပထမအပိုဒ်တွင် အဆိုပါဝန်ကြီးဘယ်အချိန်မှာရောက်လာပုံ သက်ဆိုင်ရာတာဝန်ရှိသူမည်သူမည်ဝါများက ကြိုဆိုကြပုံ ကိုဖေါ်ပြ၏ ပြီးလျှင်ဝန်ကြီးကို တာဝန်ရှိသူများက ရှင်းလင်းတင်ပြ၏ ပြီးလျင် ၀န်ကြီးက သတ်မှတ်ရက်အမီပြီးစီးအောင် ဆောက်ရွက်ရေးနှင့် လိုအပ်သည်များလမ်းညွှန်ကာ ပြန်လည် ထွက်ခွာသွားသည် ဆိုကာ ဖေါ်ပြလေ့ရှိသည် ။ ပြည်သူသိချင်သောအကြောင်းအရာ အဘယ်မှာနည်း )


( ၅ ) ပြည်သူလူထု အထူးစိတ်ဝင်စားနေသည့် Current News များကိုဖေါ်ပြခြင်းမပြုပဲ အစိုးရအဖွဲ့၏ လှုပ်ရှားဆောင်ရွက်မှုများ ကိုသာ အလေးပေးဖေါ်ပြနေသည်ကိုတွေ့ရပါသည် ။


( ၆ )ပြည်သူလူထုအပေါ်သြဇာရှိသော နယ်ပယ်အသီးသီးမှ ပညာရှင်များ ၏ပညာပေး  ဆောင်း ပါးဖေါ်ပြချက်များ ၊ အင်တာဗျုးများ မတွေ့ဘူးပါ ၊ မည်သူမည်ဝါမှန်းမသိသူများက မြန်မာပြည်သား ၊ ပြည်ချစ်သား ၊ မြစ်ဆုံသား ၊ ဆရာဝန်တစ်ဦး ၊ အငြိမ်းစားသံအမတ်ကြီးတစ်ဦး စသည်ဖြင့် ရေးသားမှုများကိုသာတွေ့နေရပါသည် ။ မည်သူပြောနေမှန်းမသိသော စကားများကို နားထောင်လိုသူ ဖတ်ရှုလိုသူ အဘယ်မှာ ရှိပါမည်နည်း ။ဖတ်ရှုသည်ထားဦးတော့ အဘယ်မှာယုံကြည်မှုရှိနိုင်ပါမည်နည်း ။

ပြောလျှင်ကုန်မည်မထင်ပါ ။ပြန်ကြားရေးဝန်ကြီးဌာနတွင် ၀ါရင့် ပညာရှင်ကြီးများ နည်းပညာအတတ်ပညာဆိုင်ရာ ကျွမ်းကျင်ကြသူများမရှိမဟုတ် ရှိကြမည်သာဖြစ်ပါသည် ၊ ထိုသူတို့သည်လည်း သူတို့၏ စွမ်းဆောင်ရည်ကို ပြသနိုင်သော ပြောင်းလဲမှု မျိုးကိုစောင့်ဆိုင်းနေကြမည်မှာ သေချာလှပါသည် ။


ကမ္ဘာကြည့် ကြည့်သော်

ကမ္ဘာတစ်လွှားနာမည်ကျော်ကြားလှသော သတင်းဌာနကြီးများဖြစ်ကြသည့် BBC, VOA , CNN အစရှိသောသတင်းဌာနကြီးများသည် သက်ဆိုင်ရာနိုင်ငံတို့၏ အစိုးရအာဘော်သတင်းဌာန များဖြစ်လေသည် ။ ထိုသတင်းဌာနကြီးများကို ထိုနိုင်ငံတို့၏ လုံခြုံရေးဆိုင်ရာအဖွဲ့အစည်းများက ပညာသားပါပါ ချုပ်ကိုင် ထားကြသည်ကို သတင်းစိတ်ဝင်စားသူတိုင်းသိကြလေသည် ။ ထို့အပြင် ဒေသတွင်း ရှိ NHK , ဆင်ဟွာ အစရှိသော သတင်းဌာနများသည်လည်း သက်ဆိုင်ရာနိုင်ငံအသီးသီး၏ နိုင်ငံပိုင် သတင်းဌာနများ ဖြစ်ကြလေသည် ။ မည်သို့ပင်ဆိုစေကာမူ ထိုသတင်းဌာနများ၏ သတင်းအရင်းအမြစ်များကို တစ်ကမ္ဘာလုံးက ကိုးကားဖေါ်ပြနေကြသည်ကို ကြည့်ဖြင်းအားဖြင့် နိုင်ငံပိုင်သတင်းဌာနများ၏ အရေးပါမှုကိုမှန်းဆ၍ ရနိုင်လေသည် ။


သတင်းစစ်မျက်နှာ 


စတုတ္ထမဏ္ဍိုင်ဟုဆိုကာ အလိမ္မာသုံး၍ ပြောဆိုနေကြသော်လည်း မီဒီယာကဏ္ဍသည် စစ်မျက်နှာ တစ်ခုသာလျှင်ဖြစ်သည် ၊ နိုင်ငံတော်ကာကွယ်ရေးအတွက် တပ်မတော်အင်အားရှိရန်လိုသကဲ့သို့ မီဒီယာအင်အားရှိရန်လည်း အထူးပင်လိုအပ်လှကြောင်းကို စစ်ဘက်တွင် အဆင့်မြင့်တာဝန်များယူခဲ့ကြသည့် နိုင်ငံတ်ာအကြီး အကဲများ မသိမဟုတ် သိရှိကြမည်သာ ဖြစ်လေသည် ။ အခြားသောအကြောင်းကြောင်းများကြောင့် အကောင်အထည်ဖေါ်ရန် နောက်ကျနေခဲ့သည်ဆိုပါမူ ယခုအချိန်တွင် မီဒီယာစစ်မျက်နှာအတွက် အင်အားတောင့်တင်းသော စစ်သည်တော်များဖြင့် တိုက်ပွဲဝင်ရန် အချိန်အခါ ကြရောက်နေပြီဖြစ်ပါကြောင်း ။


ဒေါက်တာဆိတ်ဖွား